Mamalu ngarnawarrapurlukalu Jaaraku kulirnu kara kunyjunyu ngapirnu, yungkukijalura kaja. Palunyangka Jaara manarrarringu ka kaja kanyirnu, Mamalura kurranyilu wajanyjangka. Yipuramju kaja palu yinijunu, “Yajikpa”. Palu karrpu yayitanga ngarringu, ka Yipuramjura ngapirnu yirnarriraku. Jilanyalu ngapirni, kurranyilu wajanyjangka Mamalu. Yajikpa jijijanu majurripayi ka yankulara nyinapayi.

Ka palunyajanu parangkupayipula Yajikkamupula Yijumil. Yijumil nyinangu wantiku Yayikaku kaja. Yijumilju nyurnimanu Yajikpa, ka Jaaralu nyangu. Kalu yanu Yipuramja wajarnu jilanya, “Wajala-pulanya wiyala!, kajararra Yayikakamu, yankurakupula. Mirta kanyilkuraku Yijumilju nyuntuku ngurra wartakajalurrju, nyuntun wiyarringkunyjangka, ngayuku kajaluwiyaju ngurra kanyilku, Yajikju. Wajala wiyala-pulanya kuwarri!” Yipuramju purtu kulirnu kaja Yijumilpa ngampurrmankuraku. Mama ngarnawarrapurlukalura wajarnu jilanya, “Palya-pulanya Yayikakamu Yijumilpa wiyala! Nyuntumili kaja Yajikmili marlajanukaja lalturriku.”